काठमाडौं । फिफा विश्वकप–२०२६ को समूह चरण अन्तिम चरणमा पुगेसँगै नकआउट चरण (राउण्ड अफ ३२) को समीकरण तय हुँदै जान थालेको छ । हालसम्म राउण्ड अफ ३२ का १६ खेलमध्ये आठ खेलको प्रतिस्पर्धा कुन देशको कुन देशसँग भन्ने तय भइसकेको छ भने बाँकी आठ खेल समूह चरणका अन्तिम नतिजापछि निश्चित हुनेछन्।

अहिलेसम्म तय भएका खेलहरूले विश्व फुटबलका स्थापित शक्ति र उदाउँदा टोलीबीच रोचक प्रतिस्पर्धाको संकेत गरेका छन्। दक्षिण अफ्रिका र क्यानडा, ब्राजिल र जापान, जर्मनी र पाराग्वे, नेदरल्यान्ड्स र मोरक्को, आइभरी कोस्ट र नर्वे, फ्रान्स र स्वीडेन तथा सहआयोजक अमेरिका र बोस्निया एन्ड हर्जगोभिनाबीचको भेट पक्का भइसकेको छ।

सबैभन्दा धेरै चासोको विषय भने विश्वकपमा पहिलो पटक सहभागी भएको केप भर्डेको ऐतिहासिक यात्रामाथि केन्द्रित छ। डेब्यु संस्करणमै उत्कृष्ट प्रदर्शन गर्दै समूह ‘एच’ को उपविजेता बनेर नकआउट चरणमा पुगेको केप भर्डेले अब साविक विश्वविजेता अर्जेन्टिनासँग प्रतिस्पर्धा गर्ने भएको छ। पहिलो सहभागितामै अन्तिम ३२ मा स्थान बनाउनु केप भर्डेका लागि ऐतिहासिक उपलब्धि मानिएको छ। तर, नकआउट चरणको पहिलो खेलमै अर्जेन्टिनाजस्तो विश्व फुटबलको महाशक्तिसँग भिड्नुपर्ने भएकाले उसको चुनौती निकै कठिन रहनेछ।

यसैगरी ब्राजिल र जापानबीचको खेललाई पनि निकै रोमाञ्चक मानिएको छ। एसियाली फुटबलको बलियो प्रतिनिधिका रूपमा रहेको जापानले पाँचपटकको विश्वविजेता ब्राजिलविरुद्ध आफूलाई प्रमाणित गर्ने अवसर पाउनेछ। जर्मनी र पाराग्वे, नेदरल्यान्ड्स र मोरक्को तथा फ्रान्स र स्वीडेनबीचको प्रतिस्पर्धाले पनि विश्व फुटबलका समर्थकको ध्यान तानेको छ।

सहआयोजक अमेरिकाले बोस्निया एन्ड हर्जगोभिनाको सामना गर्ने भएको छ भने अफ्रिकी प्रतिनिधि आइभरी कोस्ट र युरोपेली टोली नर्वेबीच पनि नकआउट चरणमा प्रतिस्पर्धा हुने निश्चित भएको छ।

समूह चरणका बाँकी खेल सम्पन्न भएपछि राउण्ड अफ ३२ का बाँकी आठ खेलको समीकरण पनि तय हुनेछ। त्यसपछि उपाधि होड थप रोमाञ्चक बन्दै जाने अपेक्षा गरिएको छ। विशेषगरी नकआउट चरणमा एउटा हारले प्रतियोगिताबाट बाहिरिनुपर्ने भएकाले अब हरेक खेल टोलीहरूका लागि ‘गर या मर’ को अवस्थाको हुनेछ।