काठमाडौं । बेलायतका वरिष्ठ राजनीतिज्ञ लर्ड पिटर मन्डलसनले लेबर पार्टीको सदस्यताबाट राजीनामा दिएका छन्। चर्चित यौन अपराधी जेफ्री एपस्टिनसँगको  विवादास्पद सम्बन्ध र आर्थिक लेनदेनका नयाँ तथ्यहरू सार्वजनिक भएपछि उनले यो निर्णय लिएका हुन्।

अमेरिकी न्याय विभागले हालै सार्वजनिक गरेका दस्ताबेजहरू अनुसार, एपस्टिनले सन् २००३ र २००४ को बीचमा मन्डलसनलाई ७५ हजार डलर भुक्तानी गरेको देखिएको छ। यद्यपि, मन्डलसनले यी भुक्तानीहरूको बारेमा आफूलाई जानकारी नभएको र आरोपहरू झुटो भएको दाबी गरेका छन्।
यसअघि, एपस्टिनसँगको निकटताकै कारण उनलाई सन् २०२५ सेप्टेम्बरमा अमेरिकाका लागि बेलायती राजदूतको पदबाट पनि बर्खास्त गरिएको थियो।

राजीनामा पत्रमा उनले पार्टीलाई थप अप्ठ्यारो नपार्न आफू पछि हटेको उल्लेख गर्दै पीडित महिला र बालिकाहरूसँग माफी समेत मागेका छन्।
हालै सार्वजनिक भएका फाइलहरूमा मन्डलसनका केही निजी तस्बिरहरू र एपस्टिनको स्वार्थका लागि सरकारी नीतिमा प्रभाव पार्न खोजेका इमेलहरू समेत फेला परेका छन्। यस प्रकरणले अहिले बेलायती राजनीतिमा ठूलो हलचल पैदा गरेको छ।