काठमाडौँ । मतदान भएको दुइृ दिन वितिसक्दा पनि ४ वटा निर्वाचन क्षेत्रको मतगणना अझै सुरु हुन सकेको छैन । फागुन २१ मा सम्पन्न भएको प्रतिनिधिसभा सदस्य निर्वाचनअन्तर्गत पहिलो हुने निर्वाचित हुने (प्रत्यक्ष)तर्फ १६१ स्थनामा मतणना भइरहँदा चार निर्वाचन क्षेत्रमा मतगणना अझै सुरु भएको छैन । 

निर्वाचन आयोगले दिएको जानकारी अनुसार ती निर्वाचन क्षेत्रको मतपेटिका संकलनमा ढिलाई भएको कारण अझै मतगणना सुरु हुन नसकेको हो । अझै मतगणना सुरु नभएको निर्वाचन क्षेत्रहरुमा सङखुवासभा निर्वाचन क्षेत्र नं १, गोरखा क्षेत्र नं १, मुगु क्षेत्र नं १ र धनुषा क्षेत्र नं १ रहेको छ । 

भौगोलिक कठिनता र मौसमी खराबीका कारण दुर्गम क्षेत्रको मतपेटिका सङ्कलमा ढिलाइ हुँदा ती निर्वाचन क्षेत्रमा मतगणना सुरु हुन नसकेको निर्वाचन आयोगका सूचना अधिकारी सुमन घिमिरेले जानकारी दिएका छन् । 

सङ्खुवासभामा मतपेटिका सङ्कलन भएको र सर्वदलीय बैठक बसेर केही समयमै मतगणना प्रारम्भ गर्ने तयारी छ । गोरखा १ मा पनि दुर्गम क्षेत्रबाट नेपाली सेनाको हेलिकोप्टरमार्फत मटपेटिका सदरमुकाम ल्याइएको छ । त्यस्तै मुगुमा पनि मटपेटिका सङ्कलन हुनेबित्तिकै गणना गर्ने तयारी छ । 

धनुषा निर्वाचन क्षेत्र नं १ भने मतगणनाका विषयमा सर्वदलीय सहमति खोज्ने प्रयास जारी रहेको र केही समयमै गणना प्रक्रिया अघि बढ्ने जनाइएको छ । धनुषा १ का रास्वपा उम्मेदवारको निर्वाचन आयोगले चुनावको अन्तिम समयमा उम्मेदवारी खारेज गरेपछि त्यहाँ रास्वपाले विवाद गरिरहेको छ ।