काठमाडौं । राष्ट्रिय स्वतन्त्र पार्टी (रास्वपा) ले आफ्ना बाँके क्षेत्र नम्बर ३ का उम्मेदवार खगेन्द्र सुनारको विवादित अभिब्यक्तिका सबालमा पार्टी धारणा सार्वजनिक गरेको छ । सुनारको विगतका अभिव्यक्तिलाई लिएर सामाजिक सञ्जालमा उत्पन्न विवाद र चासोका सम्बन्धमा रास्वपाले आज आफ्नो आधिकारिक धारणा सार्वजनिक गरेको हो। पार्टीका महामन्त्री कविन्द्र बुर्लाकोटीले आज एक विज्ञप्ति जारी गर्दै उम्मेदवार सुनारले आफ्ना पुराना अभिव्यक्तिप्रति आत्मलोचना र क्षमायाचना गरिसकेको जानकारी दिएका छन् । 
विज्ञप्तिमा उल्लेख भएअनुसार सुनारले आफू रास्वपामा जोडिनुअघि व्यक्त गरेका कतिपय कुराले धार्मिक/सांस्कृतिक भावनामा चोट पुगेको भए त्यसका लागि माफी मागेका छन् । उनले आफू शाकाहारी भएको, पशुपंक्षी हत्याको पक्षमा नरहेको र राष्ट्रिय जनावर गाईप्रति पूर्ण सम्मान रहेको स्पष्ट पार्दै आफ्ना भनाइहरू तोडमोड गरी प्रचार गरिएको दाबी गरेर पार्टीमा क्षमायाचना गरेका छन् ।

पार्टीले उम्मेदवार सुनारलाई भविष्यमा आफ्ना अभिव्यक्ति र व्यवहारमा थप संयम, परिपक्वता र सार्वजनिक मर्यादा कायम राख्न सचेत गराएको छ। रास्वपाले नेपालको सनातन सभ्यता, धार्मिक९सांस्कृतिक विविधता र राष्ट्रिय एकताप्रति आफू सदैव प्रतिबद्ध रहेको स्पष्ट पारेको छ।
कुनै पनि प्रकारका उत्तेजनात्मक गतिविधि वा सामाजिक सद्भाव बिगार्ने तत्वहरूको पक्षमा पार्टी नरहेको उल्लेख गर्दै रास्वपाले आफ्ना उम्मेदवारहरू संसदमा मर्यादित र देशको विधि९विधानलाई सम्मान गर्ने नेतृत्वका रूपमा उभिने विश्वास दिलाएको छ।